Вось і настаў месяц, які некаторыя жадаюць называць траўнем. Логіка іх зразумелая, але аднабаковая, свядома ці міжволі пазбаўленая некаторых фактаў, істотных для забеспячэння ўсебаковага, вычарпальнага разгляду гэтага спрэчнага пытання.
Беларускія назвы месяцаў самабытныя, матываваныя, з відавочнай сэнсавай нагрузкаю — абазначаюць нейкія з'явы прыроды, і май, на думку асоб, якія ведаюць мову неглыбока, выбіваецца з гэтага шэрагу. Да таго ж гэтае слова, па-рознаму відазмененае, прысутнічае ў неславянскіх мовах, а значыць, выглядае запазычаным. Але менавіта толькі выглядае.
У пяцітомным тлумачальным слоўніку зафіксавана такое значэнне слова «май», як «зеляніна для ўпрыгожвання». А мая́ цяпер ужо нябожчыца бабуля з Рэчыцкага раёна Гомельскай вобласці ўвогуле называла маем адно дрэва (выключна, толькі яго і больш ніякія) — клён. Неяк на Троіцу, калі я, школьнік, жыў у яе падчас летніх канікулаў, даручыла мне наламаць маю для развешвання па двары:
— Ведаеш, дзе ў нас май расце? Як выйдзеш за аблогу [аблогаю звалася сумежная з агародам абнесеная жэрдкамі паша, якая з'яўлялася часткаю сядзібы маіх родных, належала ім. — С.А.], так адразу з правага боку, каля Сцяпанавай [суседавай. — С.А.] аблогі маі растуць.
Адбывалася гэта познім вечарам (загадзя наламаць голля забыліся, спахапіліся на змярканні), і калі я вярнуўся, бабуля ў цемры прыгледзелася да маёй ношкі:
— Не збунтаваў [пераблытаў. — С. А.] поначы, ма́ю наламаў? Ага, ён.
У кагосьці з паэтаў дваццатых — трыццатых гадоў мінулага стагоддзя нават сустракаецца дзеепрыметнік «умая́ны» ў сэнсе «ўпрыгожаны зялёнымі галінкамі» (дакладна аўтара не назаву і цытату не прывяду, забыў).
Такім чынам, назва апошняга веснавога месяца «май» нічым не горшая за «травень», арганічна ўпісваецца ў сістэму беларускай мовы.
Сяргей АБРАМОВІЧ